Epaimahaiak nabarmendu du EITBko telesailak emakumeen ahalduntzea eta emakumeen arteko elkartasuna sustatzen dituela.
“IRABAZI ARTE!” telesailak 2022ko CIMA FesTVal Berdintasun saria irabazi du. Epaimahaikideek nabarmendu dutenez, emakumeen ahalduntzea eta emakumeen arteko elkartasuna sustatzen dituen telesail gaztea da. Halaber, garapen transmedia interesgarria ere azpimarratu dute, entzule gazteak erakartzeko Instagram kontua, web orria, podcasta eta komiki digital interaktiboa (app eran eskuragai dagoena) baititu. Gainera, laster, bigarren denboraldiarekin batera, TikTok aplikazioan ere egongo da.
Halaber, epaimahaiak nabarmendu nahi du Pausoka Entertainment Ekoiztetxeak eta EITBk emakumearen sustapenean egiten duen lana, ez bakarrik fikzioan, baita beste genero batzuetan ere, hala nola entretenimenduan, dokumentalean, eta emankizunak eta emakumeen kirola bultzatzearen aldeko apustu sendoa. EITBren programazioak berdintasunean aurrera egiten eta sustatzen laguntzen du.
“Irabazi Arte!” euskaraz ekoitzi du Pausokak EITB Mediarentzat, Itziar Zeberio produktore eragilearekin, eta Julene Aranburu eta Maite Duque dira telesailaren sortzaile eta gidoilariak. Saioaren lehen denboraldian, Arene (Sua Enparantza) nerabea da, eta, familiarekin batera, Bartzelonatik Learo herrira joan behar izan zuen bizitzera. Une horretatik aurrera, bizitza berri batera egokitu beharko du, aitonarekin bizi eta lagun berriak eginez. Baina, batez ere, Arenek bere inguruan aurkitzen dituen aurreiritzien aurka borrokatu beharko du emakumezkoen futbol talde bat sortzeko, herriko lehena. Zortzi atalek audientziaren harrera bikaina izan dute eta bigarren denboraldia prestatzen ari dira.